Digwyddiad am ddim yw Palas Hwyl sy’n cael ei greu gan bobl leol ar gyfer eu cymuned eu hunain. Mewn Palasau Hwyl mae pobl yn dod at ei gilydd i rannu eu sgiliau, eu diddordebau a’r hyn maen nhw’n angerddol drosto, ac i ddangos i’r byd pa mor wych a llawn athrylith y mae eu cymuned!

Cliciwch yma i gael gwybod mwy am beth yw Palas Hwyl (a beth nad yw). 

Gall unrhyw un yn y byd greu Palas Hwyl (ydy – mae hynny’n golygu chi!). Does dim angen profiad. (Ni’n addo)

Gallan nhw ddigwydd unrhyw le! Yn y gorffennol mae Palasau Hwyl wedi digwydd mewn llyfrgelloedd, theatrau, canolfannau cymunedol, gerddi, pyllau nofio, canolfannau chwaraeon, rhandiroedd, amgueddfeydd, canol trefi ac eiddo’r Ymddiriedolaeth Genedlaethol. Gall eich pecyn cymorth Dod o hyd i leoliad fod o help os oes angen i chi ffeindio lleoliad i gynnal eich Palas Hwyl. 

Beth sy’n digwydd mewn Palas Hwyl?

Beth bynnag rydych chi ei eisiau! Does dim ffordd gywir neu anghywir i Balas Hwyl ddigwydd. Mae Palasau Hwyl dan eu sang gyda’r celfyddydau, y gwyddorau, hanes, treftadaeth, technoleg, chwaraeon a mwy. Yn y gorffennol mae’r gweithgareddau wedi cynnwys origami, ffotograffiaeth, garddio, cerfluniau bwytadwy, rhannu ryseitiau, sgyrsiau am wyddoniaeth ac ecoleg, caiacio, gwneud chapatis, ymchwiliadau fforensig, codi hwyl a rap brwydr, i enwi ond rhai. 

Pryd gallan nhw ddigwydd?

Gallwch chi greu eich Palas Hwyl pryd bynnag y mynnwch! Gall para am bymtheg munud neu dri diwrnod. Cynhelir y Penwythnos o Ddathlu blynyddol ar y penwythnos cyntaf ym mis Hydref. Mae llawer o bobl yn dewis creu eu Palas Hwyl ar y diwrnodau hyn oherwydd eu bod yn hoffi bod yn rhan o rywbeth mwy sy’n digwydd ar yr un pryd ar draws y wlad. Fodd bynnag os nad ydy hynny’n gweithio i chi, gallwch ei gynnal ar amser sy’n gyfleus. 

Pam mae pobl yn creu Palasau Hwyl?

Mae pobl yn creu Palasau Hwyl am bob math o resymau. Mae rhai pobl eisiau teimlo mwy o gysylltiad â’u cymuned leol. Mae rhai pobl eisoes yn teimlo’n gysylltiedig, ond eisiau’r cyfle i wneud rhywbeth hwyl gyda’i gilydd. Mae rhai pobl eisoes yn gwneud gweithgareddau yn null Palas Hwyl, ond eisiau ymuno â’r ymgyrch genedlaethol a gwneud e ar yr un pryd â phawb arall; pan fyddwn ni i gyd yn gwneud e gyda’n gilydd, pan fyddwn ni i gyd yn sefyll i fyny ac yn dangos yr athrylith sy’n bodoli yn ein cymunedau, yn aml gall deimlo’n fwy pwerus.